أنا الذي لا أعرفه: تاج الوان الطيف الاربعتاشر

تنبيه هام
التاج ده
جالي من

فلهم الشكر

*****
هواياتي

والله مش ليا هواية معينة للاسف يعني عادي بس انا باحب اقلد الصور
ايوة مزور
يعني ادوني صورة وانا انقلها بالمللي ويمكن ده اللي خلاني انجح ف رسم الكلية مع اني اتخرجت من غير ما اعرف اجيب مسقط تالت

بس للعلم لازم تكون الصورة مش بورترية او صورة شخصية
غير كده باحب ارتب اي حاجة تخصني

دولابي وهدومي انا اللي بارتبها واوضتي انا اللي باحب ارتبها ومكتبي وكمبيوتري وكتبي انا اللي لازم ارتبها بنفسي

اشهر عيوبي

انا ؟

انا مش عندي عيوب
اممممم هو انا بقيت باتخنق بسرعة

وبيبان عليا جدا لما اكون باتعامل مع حد مش باحبة بابقى سمج جدا

وكمان مش باقدر اتحكم ف تصرفاتي لما اتضايق جدا

واعتقد قلبي اسود مش سهل اسامح اللي جرحني
مش باقولكم مش عندي عيوب

حاجات بكرها جدا

والله انا باكره الحر جدا
باكره المنظرة والفخر الزايد ,
باكرة ان حد ياخد مجهود حد تاني
باكره الدوشة والصوت العالي
باكره المنافق والوصولي وقليل الذوق
باكره الغباء و البرود واللزوجة والتدخل ف كل حاجة
باكره ابو العريف اللي عامل بيفهم ف كل حاجة
باكره ........اممممم
اصلا انا باكره كل حاجة

حاجات بحبها قوي ومش بمل من تكرارها

باحب ابص لفوق اوي
للسقف او للسما او لمرتبة السرير اللي فوق لو انا ف الشغل
شاب متطلع من الاخر
باحب كمان ابص للفضا والمناطق الواسعة المفتوحة جدا
باحب الهزارجدا
باحب العب مع الاولاد الصغيرين بس لحد سن معين اول ما يدخلوا المدرسة بيرخموا شوية
باحب اقعد وسط الناس واسمع كلامهم وحوارتهم واتفرج على تصرفاتهم " بدون الاشتراك فيها " متفرج يعني
باحب اتكلم مع حد بارتاحلة وباثق فيه وف ارائه وممكن انسى نفسي ف الكلام معاه
باحب الهدوء
غير كده انا بازهق بسرعة

سؤال بيستفزني

هما كذا سؤال بس اكتر حاجة
انت ليه كده ؟
او ايه ده انت اشول ؟
ومعاهم صوت يصدر من الفم دليل على الحسرة والاشفاق
وده لما حد يشوفني وانا باكل او باكتب لأول مرة
باحس اني مش بني ادم طبيعي
مع ان لما باشوف افلام اجنبي باكتشف ان معظم الاجانب من مستخدمي الايد الشمال وبيعاملوهم عادي يعني
كمان
امال انت بتاكل ايه يابني؟
او انت عايش ازاي كده ؟
ومعاهم نفس الصوت اللي فوق
وده لما حد يعزم عليا باي حاجة علشان انا تقريبا مش باكل معظم الحاجات اللي بتتاكل بس الحمد لله عايش وزي الفل وبرضه عادي

امنيتي في الحياة

والله انا نفسي ابقى بني ادم كويس بس
نفسي ربنا يرضى عني وارضى عن نفسي

حاجات مؤمن بيها جدا

إن لكل دين خلقا .. وخلق الإسلام الحياء
Dont steal, the government hates competition.
مش تبكي على اي حاجة ف الدنيا علشان اللي بتبكي علشانه مش يستاهل دموعك واللي يستاهلها لا يمكن يخليك تبكي من الاساس
Whatever you do, have fun doing it
الكلمة الطيبة ليست سهماً ... لكنها تخرق القلب
Some people are alive only because it's illegal to kill them !!!!

اكتر حاجة فاشل فيها

اني افتكر
نسّااااااااي بطريقة بشعة
ومش باعرف استخدم ايدي اليمين خالص
وباسيب انطباع اول اكتر من بشع

وظيفة بحبها
باحب جدا مهندسين الديكور ومهندسين العمارة
وباحب المبرمجين جدا وباحب الموزعين الموسيقيين
باحب بتوع المبيعات وخدمة العملاء

مثلي الاعلي في الحياة
هو انا مش ليا مثل اعلى محدد اي حد بيعمل حاجة كويسة ممكن يبقى ليا مثل اعلى بس احلى رد عجبني للسؤال ده

كان رد نرمين ف مدونة توهان
كان حلو اوي لدرجة اني مش عرفت اقلدة

بهدي التاج
هو انا دورت على الناس اللي وصلوا ليهم التاج ومش بعتلهم

كفايه عليهم اللي عندهم

اما الباقي فلازم ياخدوه

مقيد

فراشه

حدوتة

قلب ينبض

الخيط الرفيع

حبيبة
السته بتوع صيدلة

وهاجرب مع :

همسة قلم

علا من غزة

Posted by ولــــــــــو on Tuesday, July 15, 2008 at 2:46 PM | Permalink

حاجات مؤمن بيها عجبتني جدا جدا إجاباتك فيها، بس خد بالك إنك أخدت التاج من بنات :) "مؤمن بيها" مش "مؤمنة". أوكي؟
بس فعلا حكم جميلة أوي

نسااااي؟؟؟ "ولو" نسااااي؟
:))
معلش الزهايمر دة على الجيل كله

بتكره حد ياخد مجهودالتاني. شفتها حصلت قبل كدة مع حد تعرفه؟؟أصلها فعلا وحشة أوي
و طبعا في النهاية...ولو مفيش فيه ولاعييييب :). هحاول أجاوب عليه قريب أوي إن شاء الله
بس مش تنسى الجمايل دي بأة :)

Posted by Wish I were a Butterfly ... | July 17, 2008 at 5:25 PM

حلو التاج اوى
واجاباتك كمان
الا صحيح
هوا انت اشول؟؟؟؟:)))

Posted by blue-wave | July 17, 2008 at 7:03 PM

هقول فيك ايه ؟!!
مش عارفه ليه بقبل كلامك قوى كده
بس اكتر سمة شدتنى فى كلامك انى حاسة انك انسان طبيعى جدااا وسوى جدا على عكس ماانت بتحس من كلام الناس
سكر ياحاتم
وشكرا على التاج
عيونى هجيبلك معايا كباب كوابرى
انت تؤمر
دمت بخير

Posted by نـــــور | July 20, 2008 at 11:42 AM

بسم الله الرحمن الرحيم
انا اتخضيت

كما تدين تدان
خش يا فندم خد التاج اللى ليك عندنا
:d

اجاباتك حلوة اوى
بجد مش مجاملة
بس يعينى ان أشول :d

Posted by break | July 21, 2008 at 3:48 AM

دلوئتي دا التاج التالت اللي جالي والمفروض اعد العدة والعتاد علشان اجاوب عليهم دفعه واحده:D

بتحب ترتب حاجتك بنفسك ياه دا انت هاتبئي زوج مريح جداااااا

الانسان اللي مش بالسهل يسامح اللي جرحه بيحب اوي وبيبئي حساس اوي مش قلبه اسود ولا حاجه;)

معاااااااك في كل حاجه بتكرهها خصوصا المنظرة والفخر الزايد

اه صحيح كنت ها انسي هو انت طلعت أشول :P

سلام

Posted by قلب ينبض لله | July 22, 2008 at 6:11 PM

السلام عليكم
بص ايه حكاية شوطة النسيان اللى ماشية فى الناس دى انا كل ما ادخل اى مدونة والاقى تاج الاقى اكبر عيوب اى حد او مشاكله بمعنى اصح ياما نساي ياما كسول فعاوزة اعرف بجد ليه بقينا بننسى اوى كدا وبصراحة انا كمان نفسى اشوف حد يشوفلى حل فى حكاية النسيان دى لانى بعاااااااااانى موت من النسيان موووت

سلاموز

Posted by بث تجريبي | July 23, 2008 at 5:37 PM

سلام عليكم

صاحب حضرتك بيقول إنك تجاوزت الربع قرن :). كل سنة و انت طيب

هنتخنق من كتر التراب اللي في المدونة :). يا ترى هترجع لها قريب؟؟

تحياتي... و حمدلله على السلامة مقدما

Posted by Wish I were a Butterfly ... | August 6, 2008 at 4:07 PM

ولـــــــــو

ياااااااه انا بقالي كتير معدتش علي المدونه عندك وكنت مقله قوي في الزيارات البلوجيه لظروف في الفتره اللي فاتت
بجد افتقد مدونتك :)
علي العموم هتلاقيني لاجئه ان شاء الله

وبعدين هوا انت أشول صحيح :D
بتاكل أزاي؟ غريبه قوي
وكمان بترسم بالشمال

اصل انا كمان بتسأل نفس السؤال :)

Posted by الآء | August 6, 2008 at 9:13 PM

هاى مدونتك رقيقة جدا

اما عن التاج اجاباتك طبيبعة ونابعة من شخص طيب تحياتى لك

Posted by PrInCeSS BeRy | August 18, 2008 at 8:13 PM

السلام عليكم ورحمة الله وبركاته
هو فعلا حضرتك انسان كويس ويحتذى به فى اشياء كتيره كفايه ان حضرتك بتكره الفضول دى شئ كويس جداياريت الناس كده كتير منها

وكفايه ان حضرتك بس\تستخدم ايدك الشمال مش اليمين دى انفراد
والخنقه تقريبا بقينا كلنا كده ظروف الحياه والسرعه
ربنا مع الاجيال القادمه
ما بحبش على فكره فكرة المثل الاعلى كل انسان مثل اعلى فى تصرف ايجابى يقوم به لا مش ممكن يجمع شخص واحد بين عظيم الصفات

حكم جميله اوى يا فندم جزاك الله كل خير عنها
وكل عام وانت بخير والى الله اقرب وفى طاعته ادوم
والسلام عليكم ورحمة الله وبركاته

Posted by مؤمنه | August 23, 2008 at 3:49 PM

السلام عليكم
( باحب العب مع الاولاد الصغيرين بس لحد سن معين اول ما يدخلوا المدرسة بيرخموا شوية)
انا بتفق معك 100% لانهم بصيرو بايخين لدرجة قاتلة
وعلى فكرة انا كنت شولة
لما كنت صغيرة المدرسة اجبرتني كانو يربطو ايدي اليسار واستعمل ايدي اليمين علشان بركة اكتر
فكبرت وانا متلخبطة
يعني لما حد يقلي الغرض الفلاني موجود على اليمين ما بعرف
والمصيبة لما لما حد يقلي على الايد اللي بتكتبي فيها
انا بكتب بالتنتين !!!ء

على فكرة في مسميات ثانية مرادفة
اشول \ شولة
اشدف \شدفاوية
اعسر \عسراوية

:)

Posted by Nani | August 25, 2008 at 8:27 PM

Wish iwere a butterfly…
*طبعا لازم تعجبك مش انا اللي مجاوب
انتي نسيتي ولا ايه
انا ولو
*اه مشكلة صحيح موضوع الضماير ده عاملي مشاكل من اول ما عملت البلوج
هاحاول اخد بالي وبعدين عادي بقى المهم النية كانت ايه
*للاسف هي دي الحقيقة اللي كنت باحاول اخبيها عليكم طول الفترة دي
ايوة انا نساي ماحدش يتخض الدكتور طمني وقاللي ان الحالة مستقرة وبتتدهور بسرعة
علشان لو جه يوم وقلتلك يا رشا او منى مش تقلقي
*شفتها مين ده تجربة شخصية الحمد لله انا اتعمل معايا كل المواقف الوحشة اللي ف الدنيا
بس اهو عايش و حي ارزق الحمد لله
*وطبعا ف النهاية بيعجبني فيكي انك بتقدري اللي قدامك كويس
برافو فعلا انا مش فيا ولا عيب واللي هايقول غير كده هاديله عنوانك يبقى يسألك وانا مش طال منك غير الكلمتين دول
*جمايلك مغرقاني والله
ايه ده
حد يلحقني مش بأعرف اعوووووووم

Posted by ولــــــــــو | September 1, 2008 at 10:25 PM

Blue-wave
*منورني للمرة الاولى ويارب مش تكون الاخيرة
من كلماتك كده قدرت استشف انك بتجاملني
استنى كده
اه والله شكلها مجاملة خالص
على العموم متشكر جدا على مرورك
*بتستفزني يعني
انا ممكن اقفل البلوج بسبب حركة زي دي بس خلاص هاتنزل المرة دي علشان اول مرة بس لكن اعمل حسابك المرة الجاية
انك بتكلم واحد اشول افتكرها كويس

Habiba
*هاتقولي ايه ؟
ممكن تقولي حتة من اغنية الاساتذه عمر و دياب : خلصت فيك كل الكلام
يابنتي ده الطبيعي انا اصلي طيب وكلامي طيب وانتي طيبة فالطيبة بتعمل جذب
*طب ما كنا كويسين يعني ايه انا طبيعي دي امال انا ماشي على ايدي
وحتى ولو كده انتي تعرفي منين ؟
*تسلمي والله قلت لأختي لما تعزمنا ف رمضان تعمله اصلها متجوزة ابن عمي وكتبوا ف القسيمة بعد المهر شرط انها تعرف تعمل الكباب ده بعد شهر من تاريخه والا هايسترد نص اللي دفعه

Break
*بسم الله الرحمن الرحيم
وانا كمان
خير بقى اتخضيتي من ايه خلاني اتخض انا كمان
*تاجك يافندم متجاوب عليه بس سايبه يستوي علشان يبقى له طعم مش تيجي تقري تلاقيه ناقص حاجة
*على فكرة اشول دي مش حاجة وحشة ولا تؤثر من قريب او بعيد على قدراتي العقلية الا بالايجاب
انا مش كنت عايز اقول بس انتوا اللي بدأتوا
بيقولوا ان احنا ( اللي بيستخدموا ايدهم الشمال ) بيكونوا اذكى وناخد بالنا من الكلمة من الناس التانيين اللي هما انتوا بمقدار 30 %
للاسف ده صحيح
مش تزعلى انا متواضع وممكن اتكلم عادي مع الناس اللي اقل مني ذكاء اللي هما طبعا مش بيستخدموا الشمال
نيااااااااهاهاهاهها

Posted by ولــــــــــو | September 1, 2008 at 10:26 PM

قلب ينبض لله
*دلوقت انا اعمل ايه انتي اللي مش بتعملي الواجب بتاعك
هو انا هاعمل كل حاجة طب خدي الاجابات كمان
مش اقدر اساعدك اكتر من كده
*ههههههه اه والله ماما كانت بتقولي ربنا يرزقك بواحدة تكركبلك الدنيا
اصل موضوع الترتيب عندي زيادة شوية ساعات بابقى رخم وبادقق ف حاجات فارغة
*مش هارد تاني بصي على اخر الرد عند بريك ياجماعه والله دي حاجة طبيعية وفيه زيي كتير

Do not press F1
*موضوع النسيان ده طلع من مياه الشرب وطلع مخطط صهيوني بالتعاون مع الحزب الوطني علشان الناس تنسى نفسها
وبعدين لو سمحتي انا مش باحب اتكلم ف السياسة العلاج من الموضوع ده طبعا يا نلم العيال من الشوارع يا نوفرلهم الكلة
وده حسب تحليل رياض باشا البنطلوني

Wish I were a butterfly…
*وعليكم السلام ورحمة الله
ايه ده بيشردلي تقصدي ؟ ايوة انا عجوز بس مش بالسن على فكرة المهم الروح
وانا روحي طلعت من زمان
*عندك حق وانا جاي لقيت العنكبوت مالي الدنيا دي مشكلة انك تاخدي بلوج بحري على شارع عمومي وتسيبي الشبابيك مفتوحة
ان شاء الله ابقى اطل عليها كل فترة

Posted by ولــــــــــو | September 1, 2008 at 10:27 PM

الآء
*يااااه والله مبسوط جدا بكلامك ويارب مش يكون مجاملة بجد البلوج كمان كان بيفتقدك
هو بيقول كده ابقى خليه يحلف لو مش مصدقة وعلى العموم انتي تنوري ف اي وقت
*وبعدييييييييييين !!!!!
الموضوع ده بالذات مهم جدا بالنسبة لي
هو بجد الناس ليه بتستغرب الموضوع ؟ عادي زي ما الشخص الايمن بيعمل كل حاجة باليمين ربنا خلق نوع تاني من البشر عندهم الشمال هي السائدة
عادي مش فاهم ايه المشكلة ف كده
ياجماعه خلقة ربنا والله
*والله وانا برضه باقول البنت دي شكلها عبقرية
احنا مضطهدين اوي يا الآء
لنا الله

princess BeRy
*هاي عليكي اهلا بيكي لاول مرة
متشكر جدا على المجاملة الرقيقة دي واتمنى تكون عجبتك بجد
*سؤال بعيد عن الموضوع
السؤال بيقول علل
ازاي حضرتك وصلتي للبلوج ده ؟ ياريت لو الصدف ساعدتك انك توصلي هنا تاني تبقى تبلغيني
متشكر جدا ليكي

مؤمنة
*وعليكم السلام ورحمة الله وبركاته
هو فعلا انتي بني ادم كويس جدا ومتشكر على المجاملة دي
*احب احييكي على كلامك المشجع هما دول الناس الذوق
فعلا انا متفرد ومتجرد ومتشرد
*بصراحة كلامك جميل جدا ووجهة نظرك محترمة جدا خصوصا ف موضوع المثل الاعلى ده
متشكرا جدا على الاضافة الجميلة دي

Posted by ولــــــــــو | September 1, 2008 at 10:28 PM

Nani
وعليكم السلام ورحمة الله
*كنتي شولة ازاي ؟
حسيت انك كنتي عايزة تكملي وتقولي : وربنا يعني تاب عليا مثلا
*يانهار ابيض تصدقي انا افتكر ان ماما حكتلي حاجة زي كده بس انا فعلا مش كنت باكل ولو رخموا عليا اوي كنت بارخم انا كمان
*مشكلة صح موضوع ايدك اللي بتاكلي بيها كمان انا دايما كانوا يقولولي سلم بايدك اللي بتاكل بيها فقعدت فترة كل اللي يسلم عليا امدله ايدي الشمال فيقولي لا ايدك اللي بتاكل بيها فاقعد شوية افكر الاقيني سلمت صح بايدي اللي باكل بيها
*اشدف دي جديدة فمابالك ب شدفاوية دي

ماشي ماشي
لو قلتلي رشا أو منى هقوللك يا مسعد :). إيه رأيك؟

و بعدين هتديله عنواني ازاي و حضرتك مش عارفه؟؟؟ :). تعرف فيه كام هبة في منطقتي لوحدها؟؟؟

يللا كل سنةو انت طيب

Posted by Wish I were a Butterfly ... | September 2, 2008 at 2:54 PM

وبجد مرسي جدا علي كلامك الجميل ده
وبجد كلامي مش مجامله انا بس لولا ظروف شغلي لولا اني مش عارفه انتظم في متابعه المدونات

اما عن كوننا شول فمش هقوللك غير
لنا الله يا حاتم
ههههههههههه

طيب هقولك علي حاجه غريبه
علي فكره انا عمري متضايقت اني شوله بالعكس والله العظيم انا مبسوطه جدا
اني شوله وبحترم اي حد أشول" لانه بيكون عبقري" وبحس اني مختلفه
وببقي مبسوطه ان رسوماتي بالشمال
يمكن بصراحه الحاجه اللي مضايقاني الأكل والشرب لاني فعلا مش بعرف اكل ولا اشرب باليمين
:(

يا بني أفتخر فنحن العبقريه كلهاااا

يالا بقاو هنتضر نتواضع ونتكلم مع الناس التانيين :)))

مرسي مره تانيه للكومنت بتاعك
تحياتي لك

Posted by الآء | September 7, 2008 at 10:45 PM

هوا انته اشول؟
ههههه
كل دى حاجات بتكرهها وحاجات بتحبها سيبت ايه تانى
نسيت تقولنا بتاكل ايه ((:
دمت موفق
علاء

Posted by عايش... ولكن !!!! | September 8, 2008 at 2:50 PM

أنا الذي لا أعرفه

حاجات ماعرفهاش عن نفسي ومحدش يعرفها عني

تاج الوان الطيف الاربعتاشر

Search

Previous posts

Archives

Links