Friday, September 12, 2008

tag gedeed



تاج سطونا عليه انا وانتيخي المقيد من مدونة رحاب بسام؛ حواديت وعمل شوية تعديلات والف كام سؤال علشان الجريمة مش تبان


حاجات نفسي أعملها

* الم نفسي ف المصاريف شوية علشان ماما بتقول ايدي مخرومة
**********
* بدأت احفظ قرآن فأتمنى اني اواظب ومش استسلم ف النص زي حاجات كتير قبل كده
**********
* اطالب بحقي طالما اني مش بأذي حد تاني
**********
* اروح الجيم العب تمارين علشان انا كده صباح الانتخة وكمان اتم اتفاقي مع محمد اصل محمد صاحبي متفق معايا على كده بقالنا 4 سنين او اكتر
**********
* يبقى ليا استايل ف الحياة ف اللبس والمعاملة والكلام كده يعني
**********
* اذاكر من تاني علشان حاسس اني نسيت حاجات كتير جدا وده مش كويس ف اني ازود من امكانياتي المهنيه زي ما اتمنى
**********
* اتعلم فوتوشوب مش عارف داخل دماغي جدا اليومين دول خصوصا بعد ما شفت شغل امير اخويا عليه



حاجات باعرف اعملها/بحب اعمله
ا

*الحمد لله بيقولوا اني باقدر اخرج أي حد من حالة مش حلوة بيمر بيها .... مش عارف ازاي بس الحمد لله كمان
باحب اخلي وجودي مصدر لجو ممتع لكل اللي حواليا

**********
*مستمع جيد .... باحب اسمع الناس وهما بيحكولي حاجات تخصهم وهما واثقين اني هافهم واقدر وممكن اساعدهم ف الوصول لافضل الحلول – ساعات مش باعمل كده وتبقى النتايج عكسيه

**********
* اخلي اصحابي اصحاب .... باحب اعرّف اصحابي اللي مش يعرفوا بعض على بعض

**********


حاجات مش بعرف أعملها


استخدم ايدي اليمين

**********
اتحكم ف تصرفاتي لما اكون متضايق وخصوصا مسألة علو صوتي

**********
مش اكره حد يستاهل يتكره

**********
أبطل حالة السلبية اللي بتنتابني ف اهم لحظات ف حياتي واللي بتكون محتاجة قمة الايجابية

**********
اخفي احساسي تجاه حد معين دايما تصرفاتي بتعكس اللي حاسس بيه ناحيه الناس

**********
مش باعرف اعوم ومش حاولت اتعلم مع حبي الشديد للبحر يمكن علشان باكره احساس الغمر

**********
اني اسيب انطباع كويس مع حد بتعامل معاه مرة واحدة عادة يلزمني وقت اطول ف التعامل مع الناس

**********



حاجات بقولهم كل يوم


الفاتحة لازم اقولها كل يوم طبعا

**********
صاحبي علمني اقول دعاء الركوب

**********
" السلام عليكم " لازم اقولها طالما بأمر على اي حد او بأرد على مكالمة موبايل

**********
" ياراااااااااجل اتقي الله" علشان دايما فيه حد بيقول كلمة مش بتعجبني فتلاقيني فورا اقوله كده

**********
" اخبارك ايه يا صاحبي " اي حد مش اعرفه بالاسم فهو صاحبي حتى لو بأسأل على طريق او بأعدى فلازم اقول عن اذنك يا صاحبي – نقدر نقول دي عندي زي ياكابتن عند باقي الناس ودي غير يا صديقي اللي باقولها لاصدقائي فعلا – **********

حاجات بعملهم وعايز أبطلهم


مش اتحرج من اللي قدامي واعمل حاجه مش عايز اعملها

**********
اللامبالاة بجد عايز ابطل الموضوع ده جدا واعمل حساب لكل حاجة مش اسيب الدنيا تمشي بيا وخلاص

**********
ساعات ابقى شايف اقرب الناس ليا بيعملوا حاجا ت بتضرهم وادور وشي واعمل مش شايف
**********
ساعات بالاقي نفسي باتريأ على حد او حاجة مش اعرف عنهم حاجة اصلا وللاسف انا باعرف اوي اعمل كده
**********
الكسل ساعات كتير بابقى عايز اعمل حاجات كتير اوي وابقى مخطط ليها وبتاع لكن لازم حد يشجعني علشان اخد خطوة

سبع مدونات بزورها بأنتظام


سؤال رخم بجد
هما اكتر من سبعة بكتييييييييير اللي بأزورهم بأنتظام
انا اصلا عندي منهم دلوقتي 3 يبقى هايتفضل ايه بس انا قلت لحد انه منهم اتمنى يكون فاكر

وعلى فكرة انا مش بازور مدوناتي بانتظام علشان بابقى عارف امتى هاينزل البوست الجديد


أشخاص أتمنى أقابلهم


نفسي اقابل ناس كتير بس فيهم ناس ماتوا لكن طبعا دول مش هاقول عليهم ممكن اقول من اللي عايشين
:
الشيخ محمد حسان

**********
الشيخ اللي هاني صاحبي بيتعلم على ايديه

**********
الدكتور يحيي الجمل ( باحترمة جدا الراجل ده )

**********
الدكتور نبيل فاروق ( صاحب البصمة الكبري ف مراهقة معظم شباب مصر )

**********
الدكتور فاروق الباز ( عقلية ف رأيي مش هاتتكرر )

**********
الدكتور مصطفى محمود

**********
معز مسعود

**********

استاذ كامل اللي محمد اكل دماغي بيه

**********
كام واحد من المدونيين بقى بس مش ينفع اقول ( أحسن يتغروا ولا حاجة )



سبع أماكن أتمنى أزورهم


نيوزيلاندا ( صورة المراعي الخضرا بتننط ف دماغي اول ما اسمع اسمها )
**********
الهند ( الهند عندي يعني ألوان ... الصورة ف الهند الوان مبهرة )
**********
روسيا ( اللون الابيض اللي كاسي المكان عشرة شهور ف السنه )
**********
الصين ( اكتر شعب بأحترمه ف الدنيا )
**********
فلسطين و السعودية ( الاراضي المقدسه المسجد الحرام والمسجد الاقصى )
**********
تايلاند ( علشان دايما فكرتي عنها زي ما الراجل قال ف الفيلم : برد حر رعد برق ف نفس اللحظة . تحفففة )
**********
اسبانيا ( الاندلس والمجد الضائع ) وايطاليا (بلد "البندقية")

**********


حاجات بتقلقني


- باستنى رد فعل على كل حاجة او تصرف بأعمله
**********
- افكار لبابا وماما مش بأتفق فيها معاهم ومش بأقول لهم على آرائي دي الا لما المواضيع تتخذ مجريات اخرى

**********
- اهمال بابا لحاجات تتعلق بصحته من باب عدم الاكتراث وعدم تقدير للي ممكن يحصل فعلا

**********
- الكلام عن الشغل مع حد مش جوه المجال بتصيبني بالدوخة

**********


حاجات مش عارف الناس إزاي بتقدر تعملها


- ياكلوا سمك ميت " اللي بتقولوا عليه سمك مملح زي الرنجة والفسيخ " و معاهم السبانخ
**********
- يركبوا المترو وهو مش فيه مكان لرجل بجد مش معقول الاستعجال مقطع بعضه يعني
**********
- السجاير .... بجد مش متصور ايه مدى الاستفادة من الموضوع ..يعنى ايه ادخل سم لجسمي بنفسي
!!!!
**********
من غير ضحك مش عارف الناس بتلبس جلابيات ازاي انا مش باقدر الصراحة
**********


حاجات ما أظنش إنها هتتغير فيا أبداً


- الخنقة.... باتخنق جدا من بعض تصرفات ممكن تكون عند أي حد تاني بسيطة
**********
- افتكر حلم حلمته .... عمري ما افتكرت حلم بعد ما اصحى ده لو كنت باحلم اساسا
**********
- مش باعبر عن احساسي تجاه الاشخاص بالكلام ... دايما باتوقع ان الناس فاهمه انا احساسي ناحيتهم ايه ومهما عرفت ان المفروض اعرفهم بالكلام طالما بيفرق جامد كده برضه مش باقدر
**********
- ابطل كسوف .... باتكسف واتلجلج ومش باعرف اجمع الكلام ف بعض مواقف لا داعي لذكرها
**********



أغنية لازقة في دماغي اليومين دول

:"حال المحب " لواحد اسمه وليد حيدر اول مرة سمعتها على قناة المحور ومن ساعتها بأسمعها كل يوم مرة على الأقل دي الاغنية اللي محطوطة ف البلوج دلوقت

**********


صورة مش قادر أشيلها من مخي اليومين دول


انا بعد ما اتكلم مع صاحب الشغل ف موضوع يخصني فيقوم متنرفز ومزعق فيا اقوم شاتمه وسايب الشركة بعد ما اقدم استقالتي .... ادعولي لما اكلمه مش يحصل كده

مش حصل كده لاني مش كلمته اصلا وسيبت الشركة ورحت شركة تانيه*

**********
غير كده انا أي حاجة باقراها او اسمع عنها بتتحول لفيلم باشوفه كل لحظة لحد ما اسمع حاجة جديدة تعمل فيلم جديد
**********



فكرة مسيطرة عليا اليومين دول

هو امنية اكتر منها فكرة بس مسيطرة جدا عليا اليومين دول : نفسي اشوف النبي (صلى الله عليه وسلم) ف الرؤيا وباحاول ابقى جدير بأن ده يحصلي فعلا

**********


حاجة ندمان عليها (مش أوي يعني)

هو الحمد لله طبعا على كل شئ بس انا ساعات كتير بأندم على الفرص اللي كان ف مقدوري اني اغتنمها وتضيع بسبب اني حتى مش كنت بأبذل مجهود اني احاول فيها وكل ما افكر ف كده احس اني انسان لايعرف للطموح معنى

**********

ناس يا ريت يكتبوا حاجاتهم و محتاجاتهم

طبعا هما هما اللي بارخم عليهم واديهم التاجات كل مرة هما عرفوا اساميهم خلاص وياريت كل اللي يعدي ياخده معاه

وكل سنة وانتم طيبين

Posted by ولــــــــــو at 12:17 AM | | Comments

Tuesday, July 15, 2008

تاج الوان الطيف الاربعتاشر





تنبيه هام
التاج ده
جالي من

فلهم الشكر


*****
هواياتي

والله مش ليا هواية معينة للاسف يعني عادي بس انا باحب اقلد الصور
ايوة مزور
يعني ادوني صورة وانا انقلها بالمللي ويمكن ده اللي خلاني انجح ف رسم الكلية مع اني اتخرجت من غير ما اعرف اجيب مسقط تالت
بس للعلم لازم تكون الصورة مش بورترية او صورة شخصية
غير كده باحب ارتب اي حاجة تخصني

دولابي وهدومي انا اللي بارتبها واوضتي انا اللي باحب ارتبها ومكتبي وكمبيوتري وكتبي انا اللي لازم ارتبها بنفسي





اشهر عيوبي

انا ؟
انا مش عندي عيوب
اممممم هو انا بقيت باتخنق بسرعة
وبيبان عليا جدا لما اكون باتعامل مع حد مش باحبة بابقى سمج جدا
وكمان مش باقدر اتحكم ف تصرفاتي لما اتضايق جدا
واعتقد قلبي اسود مش سهل اسامح اللي جرحني
مش باقولكم مش عندي عيوب



حاجات بكرها جدا

والله انا باكره الحر جدا
باكره المنظرة والفخر الزايد ,
باكرة ان حد ياخد مجهود حد تاني
باكره الدوشة والصوت العالي
باكره المنافق والوصولي وقليل الذوق
باكره الغباء و البرود واللزوجة والتدخل ف كل حاجة
باكره ابو العريف اللي عامل بيفهم ف كل حاجة
باكره ........اممممم
اصلا انا باكره كل حاجة



حاجات بحبها قوي ومش بمل من تكرارها

باحب ابص لفوق اوي
للسقف او للسما او لمرتبة السرير اللي فوق لو انا ف الشغل
شاب متطلع من الاخر
باحب كمان ابص للفضا والمناطق الواسعة المفتوحة جدا
باحب الهزارجدا
باحب العب مع الاولاد الصغيرين بس لحد سن معين اول ما يدخلوا المدرسة بيرخموا شوية
باحب اقعد وسط الناس واسمع كلامهم وحوارتهم واتفرج على تصرفاتهم " بدون الاشتراك فيها " متفرج يعني
باحب اتكلم مع حد بارتاحلة وباثق فيه وف ارائه وممكن انسى نفسي ف الكلام معاه
باحب الهدوء
غير كده انا بازهق بسرعة



سؤال بيستفزني

هما كذا سؤال بس اكتر حاجة
انت ليه كده ؟
او ايه ده انت اشول ؟
ومعاهم صوت يصدر من الفم دليل على الحسرة والاشفاق
وده لما حد يشوفني وانا باكل او باكتب لأول مرة
باحس اني مش بني ادم طبيعي
مع ان لما باشوف افلام اجنبي باكتشف ان معظم الاجانب من مستخدمي الايد الشمال وبيعاملوهم عادي يعني
كمان
امال انت بتاكل ايه يابني؟
او انت عايش ازاي كده ؟
ومعاهم نفس الصوت اللي فوق
وده لما حد يعزم عليا باي حاجة علشان انا تقريبا مش باكل معظم الحاجات اللي بتتاكل بس الحمد لله عايش وزي الفل وبرضه عادي

امنيتي في الحياة

والله انا نفسي ابقى بني ادم كويس بس
نفسي ربنا يرضى عني وارضى عن نفسي




حاجات مؤمن بيها جدا

إن لكل دين خلقا .. وخلق الإسلام الحياء
Dont steal, the government hates competition.
مش تبكي على اي حاجة ف الدنيا علشان اللي بتبكي علشانه مش يستاهل دموعك واللي يستاهلها لا يمكن يخليك تبكي من الاساس
Whatever you do, have fun doing it
الكلمة الطيبة ليست سهماً ... لكنها تخرق القلب
Some people are alive only because it's illegal to kill them !!!!




اكتر حاجة فاشل فيها

اني افتكر
نسّااااااااي بطريقة بشعة
ومش باعرف استخدم ايدي اليمين خالص
وباسيب انطباع اول اكتر من بشع



وظيفة بحبها
باحب جدا مهندسين الديكور ومهندسين العمارة
وباحب المبرمجين جدا وباحب الموزعين الموسيقيين
باحب بتوع المبيعات وخدمة العملاء

مثلي الاعلي في الحياة
هو انا مش ليا مثل اعلى محدد اي حد بيعمل حاجة كويسة ممكن يبقى ليا مثل اعلى بس احلى رد عجبني للسؤال ده
كان رد نرمين ف مدونة توهان
كان حلو اوي لدرجة اني مش عرفت اقلدة

بهدي التاج
هو انا دورت على الناس اللي وصلوا ليهم التاج ومش بعتلهم
كفايه عليهم اللي عندهم

اما الباقي فلازم ياخدوه


مقيد
فراشه
حدوتة
قلب ينبض
الخيط الرفيع
حبيبة
السته بتوع صيدلة

وهاجرب مع :

همسة قلم
علا من غزة

Posted by ولــــــــــو at 2:46 PM | | Comments

Monday, March 24, 2008

بارانويا


Posted by ولــــــــــو at 7:31 PM | | Comments

Friday, January 25, 2008

تاج مذكر والجمع تاجات مؤنث سالم


التاج ده وصلي من تقريبا اربع مدونات فاكر منهم
انسانة
عازف الناي
واسف للي مش فاكر مين وبأشكرهم جدا على الهدية اللذيذه دي

لو قالولك اختار عصر من عصور مصر علشان تعيش فيه تختار اى عصر و فى عهد اى حاكم .. واشمعنى؟
مع اني مش ليا ف التاريخ ولا بأحب احفظه بس كان نفسي أعيش ف عصر محمد على ايام مرحله بناء مصر الحديثة من جديد
مش عارف بأعتقد ان الفترة دي لو كانت استمرت اكتر من اللي فضلته شويه كانت مصر هاتبقى حاجه تانيه خالص
احسن وارقى واعلى مكانه ومتقدمه علميا
بلد متحضرة بكل معنى الكلمة او على الاقل كنا هانكون زي تركيا بس متمسكين بديننا اكتر كتيير
.
اول اولويه فى حياتك عيلتك ولا شغلك ولااصحابك؟
بصوا انا بأعتبر اصحابي جزء من عيلتي وعلشان كده هأقول عيلتي وده معناه عيلتي اللي هي بيتنا واصحابي بأقسامهم التلاته الاولانيين اللي بأشوفهم واكلمهم واقابلهم والتانيين اصحابي من العالم الفانتازيا اللي هما حضراتكم والاخرانيين اللي بيجمعوا بين الاتنين وكمان باعتبرهم من عيلتي ودول هما واحد بس هو محمد صاحبي
ووالله هو ده اللي حاسة مش دبلوماسية ولا حاجة
الشغل ده بقى اخر حاجه ممكن افكر فيها انا اصلا نص حياتي عاطل فالشغل مش البيج دييل بالنسبه ليا


لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟
بصراحة متهيألي مش هأكون
اولا انا لما احكم ف موضوع بالنسبه للناس اللي اعرفهم بيتحكم ف احكامي عليهم جانب من العاطفة وبالتالي لو واحد مظلوم وكان الظالم حد اعرفه هاجيب للمظلوم حقه من غير ما اعاقب الظالم وده هو قمه الظلم وكمان انا باعتبر اني مش عندي الصفات القياديه علشان امشّي نفسي مش شويه ناس كمان معايا
لكن لو حصل وكنت حاكم وعايز اتأكد اني هأكون عادل فهاستقيل من الحكم
ربنا ما يحكمي على حد علشان بجد هابقى وحش اوي


اللى بيبوظ الحكام .. نفسهم؟ ولا الشعب؟ ولا الحاشيه المقربه؟
والله كلهم بس اللي حواليهم سواء الشعب او الحاشيه بيكونوا السبب الاكتر من وجهه نظري

مين أكتر اعلامي مصري بتحترمه؟
منى الشاذلى وبرنامج احمد العسيلي بيعجبني جدا وبأحب مجدي مهنا على اساس انه بيعمل برنامج ف التليفزيون
وممكن الدكتور عمرو عبدالسميع ساعات واللي ملاحظينه انه مش فيهم حد اعلامي خالص غير منى الشاذلي بس بصراحه بأحبها جدا

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
انا من صغري عايز اطلع طيار بس اكتشفت ان عندي فوبيا الارتفاعات فلغيت الفكره من دماغي لكن اللي كان نفسي فيه بجد ومازال
كان نفسي ابقى حافظ للقرآن واشتغل داعيه
والله ده بجد
ربنا يقدرني واقدر اعمل نص ده حتى
بس محمد صاحبي قالي لو مهنة علشان اكسب قوت يومي فاهتبقى حاجة ليها علاقة بالديكور
بيقولوا عندي ذوق ف انتقاء الحاجات وتركيبها على بعض


ايه تانى بلد تتمنى تعيش فيها بعد مصر؟
نفسي كنت اعيش ف الاندلس ايام مجدها لكن دلوقت ممكن اقبل ب نيوزيلاندا بيقولوا مليانه مراعي خضرا
بس حلوة بعد مصر دي عرفتوا منين ان مصر هي الاولى


اوصف ليا ترتيبات اجمل فرح ممكن تحضره
اجمل فرح بالنسبه ليا اللي اروحه عشان عايز اروحه مش رايح لمجرد المجامله ويكون العروسين بيحبوا بعض بجد وتكون حاله السعاده والبهجه محاوطه المكان ومش يكون فيه اغنيات هابطه او موسيقى للرقص واللي يخلص بدري علشان مش بأحب اسهر بره البيت كتير
ربنا يسهل ويكون فرحي بعد عمر طويل بالشكل ده


بتراعي كلام الناس والقيل والقال؟ لو اه او لو لا قول لى ليه؟
بصراحة للاسف آه وده حاجة مش عجباني وبأحاول اغيرها ومش عارف
السبب
حقيقي مش أعرفه بس انا بأحافظ ان سيرتي لما تيجي بين حد يعرفني بأحب انها تكون كويسة غير كده مع الناس اللي مش اعرفها اللي ف الشارع يعني ساعات بيهمني وساعات لأ

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
جامد جدا
ياسلام وانا راكب فوق الحصان ورايح اشتري تي شيرت مثلا
انا بأشوف ان التكنولوجيا زي ما اديتنا مميزات كتير خدت مننا حريتنا بطريقه او بأخرى وابعدتنا عن الناس وقطعت كل صله بتربطنا ببعض غير شويه مجاملات حتى مش بنحس بمعظمها
السبب الوحيد اللي ممكن ازعل علشانه بجد اني مش هأعرف اتكلم معاكم تاني
بس ممكن نقضيها رسايل بالحمام الزاجل كل واحد يحفّظ الحمام اللي عنده الايميلات بتاعه الناس التانيه وهما يتولوا الامربس اعتقد ان كتير مننا مش هايصمد لفتره طويله ونلاقي الانسان انقرض من طائفه الكائنات الحيه وخللي الحمام والحصنه يملوا الدنيا لوحدهم

السعاده هى؟
الرضا بقضاء الله والرضا عن نفسي
ربنا يرزقني بجد الموضوع ده علشان نفسي اجرب احساس اني ابقى سعيد بجد
مش فرحان
لأ
سعيد
الحاله المستمره للفرح


عندك أمل ؟؟ أسبابك ؟
عندي شويه
حد عايز حبه؟
اسبابي انه عرفت ناس كتير لسه الدنيا مش غيرتهم وعرفت ناس مش بيستسلموا للاحباط وعرفت ناس بيقاتلوا علشان يخلوا الدنيا احسن من حواليهم وعرفت ناس تفكيرها سابق سنها وناس نفوسها صافيه وناس قلوبها بيضا
فوق كل ده ان رحمه ربنا واسعه


لما تحب تهرب من كل شئ بتروح فين؟
بأدخل أنام
بجد النوم هو الحل المثالي بالنسبه ليا لما اي مشكله تقابلني ومش اعرف احلها واحب اهرب هما 5 ساعات واصحى بني ادم تاني ومعايا الحل
ممكن يكون مؤقت فلما يخلص ارجع انام تاني علشان اكمل باقي الحل


امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
زمااااان وانا ف تانيه اعدادي لما بابا سافر الكويت ساعتها قعد معايا وقالي اني انا بقيت راجل البيت ومسئول ولازم ابقى قد المسئوليه ديي وكده
ساعتها قعدت مع نفسي وقلت ياااه معقول انا بقيت كده فعلا ومش صدقت لكن لما بابا سافر فعلا ماما كانت بتعاملني اني فعلا راجل البيت وكانت بتشركني ف كل حاجه ساعتها فعلا قلت انا الظاهر كبرت بجد
كمان لما اختي اتخطبت ابن عمي خطبها مني انا علشان بابا كان لسه مسافر وقالي انا هاسيبك تكلم باباك
ساعتها قلت اني كبرت فعلا وده كان اول واخر مره افرح اني كبرت

لما بتعمل عمل خيرى بيكون ايه هو دافعك الاول؟
اولا خيري مش بيسيبني اشتغل مكانه
لكن لو قصدك عمل خير يبقى اكيد قصدي الفشخره والمناظر!!!
مش عارف مش اقدر اقول اني بأعمل كده علشان الثواب بس علشان متهيألي انا مش وصلت للمرحله دي لكن ساعتها باحس ان انا عايز اعمل كده وخلاص لوجه الله من غير سبب ويمكن بابقى محتاج اني افتكر اني ف نعمه وفيه ناس تانيه ليها حق ف النعمه دي
مش بأحب افكر ف الموضوع اصلا هي حاله بتنتابني ومش بأكون مخطط ليها بس اكيد بأتمنى ان ده يكون ليه جزاء عند ربنا ف النهايه


بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
لأ الحمد لله .. ومش بأطيق ريحتها ولا اللي بيدخنوها مع اني والدي من الناس دي
هو انا قلت لأ لكن انا شعوري عامة من اي حد بيشرب سجاير اني بأبقى مش مبسوط وطبعا لو واحده ست فده بيخليني متنرفز علشان انا مش شايف ان ده ليه اي تأثير ايجابي وبعدين خلاص المساواه هاتختل لو كمان مش بقت ف السجاير
حاجه تنرفز بجد مانا تقريبا كل حياتي متغاظ من حاجه وبرضه مش دخنت مع اني بأبقى عايز حاجه انفس بيها واخرج شعوري زي ما اي حد بيتحجج قدامي لما اسأله بتدخن ليه
النهايه ان دي حجج واهيه وبعدين بصراحه ولد ولا بنت هي حاجه مستفزه وخلاص


بتعرف ايدك اليمين من الشمال ازاي؟
للاسف الايد اللي بأعمل بيها كل حاجه هي الشمال واللي دايما ف جيبي هي اليمين فبسهوله جدا اي حاجه قدامي هامد ايدي اخدها تبقى هي دي الشمال
حاولت كتير اغير من ده لكن مش عرفت


ايه اكتر اله موسيقيه بتحبها ؟
امممممممممم انا بأحب صوت الفلوت جدا وبعدها الساكسفون وبعدها الجيتار وطبعا العود بس اوقات اوقات


فى رأيك ليه الذوق والنخوه اتعدموا؟
هما مش اتعدموا خالص
انا مثلا واحد من الناس ذوق ذوق ذوق صراحه فوق ما تتخيلوا
لكن ممكن يكون السبب ف سياسة "وانا مالي خلليني ماشي جنب الحيط والبلد تولع مادام انا بعيد"
عموما معظم الناس ركنت اخلاقها على الرف وبتطبق مقوله الواحد فيه اللي مكفيه وبالتالي الاحساس بالآخر مش بقى موجود الا ف اضيق الحدود


ايه الحاجه اللى لو حصلتلك تبقى سعيد قوى؟؟؟
اني اقرب من ربنا اكتر لدرجه اني انبسط من نفسي او اي حاجه اعملها لحد وبسببها يكون مبسوط او اي حاجه اعملها وتطلع كويسه اوي وتعجب اي حد ويقولي اني كويس او اني اعمل حاجه قصدي منها خير ويتفهم قصدي ده او اني اخللي محمد صاحبي مش زعلان مني واحس فعلا انه مش زعلان مش بيقول كده علشان يريحني ودي قلما بتحصل

حد فهم حاجه؟

تختار يبقى عندك...ارض زراعيه ولا احسن عربيات و لا كام عماره و لا فلوس فى البنك؟؟؟؟
ينفع كلهم ؟
بس انا لو بابص للأمور من نظره مادية بحته يبقى اختار الفلوس وانا اعمل بيها اللي انا عايزه
انا مش عايز اتعب حد معايا يا جماعة


البحر و لا النيل؟؟؟
يمكن بأحب البحر اكتر علشان مساحته اكبر فتقدر تسرح جامد وكمان مش هاتلاقي ولد صغير بيشد ف هدومك ولا راجل رخم بيقولك ورده للهانم رغم انك واقف لوحدك او بتاع حمص الشام اللي لازم تأخد منه والا مش هاتعدي ومش فيه زحمه ودوشه عربيات ودخان وانوار كتير
اللي اقصده ان البحر بيعمل حاله سلام نفسي مش بألاقيها ف النيل وطبعا البحر ليه صوت وريحه انا ف اعتقادي من احسن الحاجات اللي بافرح لما تحصل


مركب و لا طياره؟؟
مركب وده كان لايمكن اقوله لحد خمس سنين فاتوا بس طبعا مادام بأحب البحر فأكيد هاحب المركب مع اني مش بأعرف اعوم وبأخاف جدا من الميه



مجنون و لا عاقل؟؟
عاقل مع اللي يعرفوني مجنون مع باقي الناس


تقرأ كتاب و لا تتفرج عليه فيلم؟
مش فيه قصص اتعملت افلام وعجبتني غير يمكن بين الاطلال غير كده احب اسمع حد اتفرج على الفيلم ويحكيلي عنه وخصوصا محمد صاحبي عنده قدرة عجيبه تخليك تحس انك فعلا مش فاتك اي حاجه من الفيلم ومش محتاج تتفرج عليه تاني


تمرر التاج لمين؟؟
هما عارفين نفسهم
انا هاذكر الاسماء الحقيقيه للمرة الاولى والاخيره وده معناه اني هابدأ ادور على الاسماء دي
المقيد
الفراشه
الحدوته
الحلم العربي
الهمسات الدافئه
القلب النابض
ماي هووبس
الايام الحلوة
جزء مني
ترو لف
براعم الكلمات
ماي ايماجينيشن
كلمات klmat

Posted by ولــــــــــو at 4:42 PM | | Comments

Thursday, October 25, 2007

لــــو كان ينفع


التاج ده انا اخدته من مدونه اميره البلطجية


بس والله من زمان وانا طلبته منها ف المره الوحيده اللي سيبت عندها كومنت

مش بلطجه يعني
وكل اللي يعدي ياخده معاه
واللي يحب ياخده من غير مايعدي برضه ماشي

المدونه روعه وصاحبتها خرافيه


اللي لسه مازارهاش يبقى خسر كتيييير


***

لو كان بامكاني ان اكون شهراً في السنة الميلاديه ، لكنت..اكتوبر شهر العظماء
*
لو كان بامكاني ان اكون شهراً في السنة الهجريه ، لكنت..رمضان شهر القرآن
*
لو كان بامكاني ان اكون يوماً في الاسبوع لكنت... الاثنين
*
لو كان بامكاني ان اكون وقتاً في اليوم، لكنت ...الوقت بين صلاه الفجر وشروق الشمس
*
لو كان بأمكاني ان اكون كوكباً، لكنت..بلوتو
*
لو كان بامكاني ان اكون مخلوقاً اخراً، لكنت..جبل
*
لوكان بامكاني ان اكون جهة، لكنت ... الشمال الغربي
*
لو كان بامكاني ن اكون شيئاً، لكنت مصباح
*
لو كان بامكاني ان اكون سائلاً، لكنت ..عصير فراوله
*
لو كان بامكاني ان اكون شجرة... لكنت... توته
*
لو كان بامكاني ان اكون طائراً، لكنت ... هدهد
*
لو كان بامكاني ان اكون الة موسيقية....ساكسفون
*
لو كان بامكاني ان اكون نباتاً، لكنت ... دوار الشمس
*
لو كان بامكاني ان اكون طقساً، لكنت ... جو بحر الشمال
*
لو كان بامكاني ان اكون ظاهرة طبيعية، لكنت ..... مد
*
لو كان بامكاني ان اكون ثمرة، لكنت ... فراولايه
*
لو كان بامكاني ان اكون شخصية خرافية، لكنت ....جحا
*
لو كان بامكاني ان اكون صوتا، لكنت... تصادم الامواج
*
لو كان بامكاني ان اكون رنينا، لكنت.... رنين هو فيه اختيارات
*
لو كان بامكاني ان اكون عنصرا، لكنت هيليوم
*
.لو كان بامكاني ان اكون عنصرا في جدول ميندلييف، ماهو الهيليوم ف مندليف وعدده الذري 2 بالاماره
*
لو كان بامكاني ان اكون اغنية، لكنت انا مش عارف اتغير تامر حسني وبعدها سألت نفسي احمد سعد
*
لو كان بامكاني ان اكون مكاناً، لكنت .. مسجد
*
لو كان بامكاني ان اكون مادة دراسيه ، لكنت ... انجليزي
*
لو كان بامكاني ان اكون مادة ، لكنت ... كريم بشرة
*
لو كان بامكاني ان اكون طعما، لكنت ...فواكه استوائيه
*
و كان بامكاني ان اكون رائحة، لكنت رائحة...بنفسج
*
لو كان بامكاني ان اكون كلمة، لكنت كلمة..اطمئنان
*
لو كان بامكاني ان اكون موضوعاً، لكنت .... طرق علاج قهر الذات
**
لو كان بامكاني ان اكون جزءا من الوجه، لكنت البشره
*
لو كان بامكاني ان اكون شكلا هندسيا، لكنت شبه منحرف ههههه
*
لو كان بامكاني ان اكون لوناً، لكنت رصاصي
*
لو كان بامكاني ان اكون رقماً...لكنت تسعه وتسعين
*
لو كان بأمكاني أبقي شخصية كرتونية..لكنت الفيل دامبو - ابو ودان كبيره


**

Posted by ولــــــــــو at 7:14 PM | | Comments

Monday, August 20, 2007

اعرفكم بنفسي


Posted by ولــــــــــو at 2:24 AM | | Comments