أنا الذي لا أعرفه: tag gedeed

تاج سطونا عليه انا وانتيخي المقيد من مدونة رحاب بسام؛ حواديت وعمل شوية تعديلات والف كام سؤال علشان الجريمة مش تبان

حاجات نفسي أعملها

* الم نفسي ف المصاريف شوية علشان ماما بتقول ايدي مخرومة

**********

* بدأت احفظ قرآن فأتمنى اني اواظب ومش استسلم ف النص زي حاجات كتير قبل كده

**********
* اطالب بحقي طالما اني مش بأذي حد تاني

**********
* اروح الجيم العب تمارين علشان انا كده صباح الانتخة وكمان اتم اتفاقي مع محمد اصل محمد صاحبي متفق معايا على كده بقالنا 4 سنين او اكتر

**********
* يبقى ليا استايل ف الحياة ف اللبس والمعاملة والكلام كده يعني

**********
* اذاكر من تاني علشان حاسس اني نسيت حاجات كتير جدا وده مش كويس ف اني ازود من امكانياتي المهنيه زي ما اتمنى

**********
* اتعلم فوتوشوب مش عارف داخل دماغي جدا اليومين دول خصوصا بعد ما شفت شغل امير اخويا عليه

حاجات باعرف اعملها/بحب اعمله

*الحمد لله بيقولوا اني باقدر اخرج أي حد من حالة مش حلوة بيمر بيها .... مش عارف ازاي بس الحمد لله كمان

باحب اخلي وجودي مصدر لجو ممتع لكل اللي حواليا

**********
*مستمع جيد .... باحب اسمع الناس وهما بيحكولي حاجات تخصهم وهما واثقين اني هافهم واقدر وممكن اساعدهم ف الوصول لافضل الحلول – ساعات مش باعمل كده وتبقى النتايج عكسيه

**********
* اخلي اصحابي اصحاب .... باحب اعرّف اصحابي اللي مش يعرفوا بعض على بعض

**********

حاجات مش بعرف أعملها

استخدم ايدي اليمين

**********
اتحكم ف تصرفاتي لما اكون متضايق وخصوصا مسألة علو صوتي

**********
مش اكره حد يستاهل يتكره

**********
أبطل حالة السلبية اللي بتنتابني ف اهم لحظات ف حياتي واللي بتكون محتاجة قمة الايجابية

**********
اخفي احساسي تجاه حد معين دايما تصرفاتي بتعكس اللي حاسس بيه ناحيه الناس

**********
مش باعرف اعوم ومش حاولت اتعلم مع حبي الشديد للبحر يمكن علشان باكره احساس الغمر

**********
اني اسيب انطباع كويس مع حد بتعامل معاه مرة واحدة عادة يلزمني وقت اطول ف التعامل مع الناس

**********

حاجات بقولهم كل يوم

الفاتحة لازم اقولها كل يوم طبعا

**********
صاحبي علمني اقول دعاء الركوب

**********
" السلام عليكم " لازم اقولها طالما بأمر على اي حد او بأرد على مكالمة موبايل

**********
" ياراااااااااجل اتقي الله" علشان دايما فيه حد بيقول كلمة مش بتعجبني فتلاقيني فورا اقوله كده

**********
" اخبارك ايه يا صاحبي " اي حد مش اعرفه بالاسم فهو صاحبي حتى لو بأسأل على طريق او بأعدى فلازم اقول عن اذنك يا صاحبي – نقدر نقول دي عندي زي ياكابتن عند باقي الناس ودي غير يا صديقي اللي باقولها لاصدقائي فعلا – **********

حاجات بعملهم وعايز أبطلهم

مش اتحرج من اللي قدامي واعمل حاجه مش عايز اعملها

**********
اللامبالاة بجد عايز ابطل الموضوع ده جدا واعمل حساب لكل حاجة مش اسيب الدنيا تمشي بيا وخلاص

**********
ساعات ابقى شايف اقرب الناس ليا بيعملوا حاجا ت بتضرهم وادور وشي واعمل مش شايف

**********
ساعات بالاقي نفسي باتريأ على حد او حاجة مش اعرف عنهم حاجة اصلا وللاسف انا باعرف اوي اعمل كده

**********
الكسل ساعات كتير بابقى عايز اعمل حاجات كتير اوي وابقى مخطط ليها وبتاع لكن لازم حد يشجعني علشان اخد خطوة

سبع مدونات بزورها بأنتظام

سؤال رخم بجد
هما اكتر من سبعة بكتييييييييير اللي بأزورهم بأنتظام
انا اصلا عندي منهم دلوقتي 3 يبقى هايتفضل ايه بس انا قلت لحد انه منهم اتمنى يكون فاكر

وعلى فكرة انا مش بازور مدوناتي بانتظام علشان بابقى عارف امتى هاينزل البوست الجديد

أشخاص أتمنى أقابلهم

نفسي اقابل ناس كتير بس فيهم ناس ماتوا لكن طبعا دول مش هاقول عليهم ممكن اقول من اللي عايشين

:
الشيخ محمد حسان

**********
الشيخ اللي هاني صاحبي بيتعلم على ايديه

**********
الدكتور يحيي الجمل ( باحترمة جدا الراجل ده )

**********
الدكتور نبيل فاروق ( صاحب البصمة الكبري ف مراهقة معظم شباب مصر )

**********
الدكتور فاروق الباز ( عقلية ف رأيي مش هاتتكرر )

**********
الدكتور مصطفى محمود

**********
معز مسعود

**********

استاذ كامل اللي محمد اكل دماغي بيه

**********
كام واحد من المدونيين بقى بس مش ينفع اقول ( أحسن يتغروا ولا حاجة )

سبع أماكن أتمنى أزورهم

نيوزيلاندا ( صورة المراعي الخضرا بتننط ف دماغي اول ما اسمع اسمها )

**********
الهند ( الهند عندي يعني ألوان ... الصورة ف الهند الوان مبهرة )

**********
روسيا ( اللون الابيض اللي كاسي المكان عشرة شهور ف السنه )

**********
الصين ( اكتر شعب بأحترمه ف الدنيا )

**********
فلسطين و السعودية ( الاراضي المقدسه المسجد الحرام والمسجد الاقصى )

**********
تايلاند ( علشان دايما فكرتي عنها زي ما الراجل قال ف الفيلم : برد حر رعد برق ف نفس اللحظة . تحفففة )

**********
اسبانيا ( الاندلس والمجد الضائع ) وايطاليا (بلد "البندقية")

**********

حاجات بتقلقني

- باستنى رد فعل على كل حاجة او تصرف بأعمله

**********

- افكار لبابا وماما مش بأتفق فيها معاهم ومش بأقول لهم على آرائي دي الا لما المواضيع تتخذ مجريات اخرى

**********

- اهمال بابا لحاجات تتعلق بصحته من باب عدم الاكتراث وعدم تقدير للي ممكن يحصل فعلا

**********

- الكلام عن الشغل مع حد مش جوه المجال بتصيبني بالدوخة

**********

حاجات مش عارف الناس إزاي بتقدر تعملها

- ياكلوا سمك ميت " اللي بتقولوا عليه سمك مملح زي الرنجة والفسيخ " و معاهم السبانخ

**********
- يركبوا المترو وهو مش فيه مكان لرجل بجد مش معقول الاستعجال مقطع بعضه يعني

**********
- السجاير .... بجد مش متصور ايه مدى الاستفادة من الموضوع ..يعنى ايه ادخل سم لجسمي بنفسي

!!!!

**********

من غير ضحك مش عارف الناس بتلبس جلابيات ازاي انا مش باقدر الصراحة
**********

حاجات ما أظنش إنها هتتغير فيا أبداً

- الخنقة.... باتخنق جدا من بعض تصرفات ممكن تكون عند أي حد تاني بسيطة

**********

- افتكر حلم حلمته .... عمري ما افتكرت حلم بعد ما اصحى ده لو كنت باحلم اساسا

**********

- مش باعبر عن احساسي تجاه الاشخاص بالكلام ... دايما باتوقع ان الناس فاهمه انا احساسي ناحيتهم ايه ومهما عرفت ان المفروض اعرفهم بالكلام طالما بيفرق جامد كده برضه مش باقدر

**********

- ابطل كسوف .... باتكسف واتلجلج ومش باعرف اجمع الكلام ف بعض مواقف لا داعي لذكرها

**********

أغنية لازقة في دماغي اليومين دول

:"حال المحب " لواحد اسمه وليد حيدر اول مرة سمعتها على قناة المحور ومن ساعتها بأسمعها كل يوم مرة على الأقل دي الاغنية اللي محطوطة ف البلوج دلوقت

**********

صورة مش قادر أشيلها من مخي اليومين دول

انا بعد ما اتكلم مع صاحب الشغل ف موضوع يخصني فيقوم متنرفز ومزعق فيا اقوم شاتمه وسايب الشركة بعد ما اقدم استقالتي .... ادعولي لما اكلمه مش يحصل كده

مش حصل كده لاني مش كلمته اصلا وسيبت الشركة ورحت شركة تانيه*

**********
غير كده انا أي حاجة باقراها او اسمع عنها بتتحول لفيلم باشوفه كل لحظة لحد ما اسمع حاجة جديدة تعمل فيلم جديد
**********

فكرة مسيطرة عليا اليومين دول

هو امنية اكتر منها فكرة بس مسيطرة جدا عليا اليومين دول : نفسي اشوف النبي (صلى الله عليه وسلم) ف الرؤيا وباحاول ابقى جدير بأن ده يحصلي فعلا

**********

حاجة ندمان عليها (مش أوي يعني)

هو الحمد لله طبعا على كل شئ بس انا ساعات كتير بأندم على الفرص اللي كان ف مقدوري اني اغتنمها وتضيع بسبب اني حتى مش كنت بأبذل مجهود اني احاول فيها وكل ما افكر ف كده احس اني انسان لايعرف للطموح معنى

**********

ناس يا ريت يكتبوا حاجاتهم و محتاجاتهم

طبعا هما هما اللي بارخم عليهم واديهم التاجات كل مرة هما عرفوا اساميهم خلاص وياريت كل اللي يعدي ياخده معاه

وكل سنة وانتم طيبين

Posted by ولــــــــــو on Friday, September 12, 2008 at 12:17 AM | Permalink

هاى ياتوما
-شفت السلام الدلع ده-
يلا اى خدمه
اول تعليق هنا برضه
افتكر الجمايل بس

بص التاج ده ياحاتم ضافل كتير قوى عنك
ياراجل ده انا اكتشفت انى تقريبا ماعرفش عنك حاجه خالص:)

بس ياحاتم انت اهديتلى تاجات قبل كده
حرام ابقى انا مش الناس اللى اهيتلها التاج ده
انا اصلا كنت بقرا ومذهوله وعماله اقول حاتم جاوب الحاجات دى ازاى؟

وقعدت ادعى ربنا انها ماتكونش هتعدى عليا لانها محتاجه تلات شهور علشان افكرفى الاجابات دى
ياخبر
صعبه بجد

عموما شخصيه جديره بالاحترام
بس نسيت تقول ان من ضمن الحاجات الى عمرك مش هتقدر تعملها هى انك تبطل تزعل الناس منك

سلاااااااام

Posted by نـــــور | September 18, 2008 at 11:44 AM

عارف؟
التاج دة المرة دي حاساه بيعرف الناس على الشخصية أوي أكتر من التاجز اللي كانت قبل كدة كمان

أتمنى طبعا تقدر تحقق كل أحلامك و أولهم إنك تواظب على حفظ القرآن لأنك فعلا قلتها قبل كدةفي تاج تاني
يارب ربنا يثبتك عليها يا ولو
امممم... :) واضح من التاج إن موضوع الكسل كبير عندك :))تفتكر دي ممكن تتغير؟
عجبني أوي إنك تخلي اصحابك اصحاب دي.و فعلا أصدق إنك مصدر سعادةللي حواليك جدا
بس هو مش بتعرف تستعمل إيدك اليمين حتى في الأكل؟؟ أصل أعرف إن الأشول برده بياكل باليمين لأن لازم!! و لا إيه؟
عيوبك و الحاجات اللي بتكرهها فيك طالما تعرفها و محددها يبقى إن شاء الله هتقدر تتخلص منهافي يوم من الأيام
يمكن مش معاك في كل البلاداللي نفسك تزورها بس عجبني أسبابك لزيارة كل بلد"خصوصا تايلاند :)". كفاية كدة عشان كلامي كتيرجدا كدة
بس بجد تاج لذيذ... و أسئلته كتير أوييي :( أرجوك اتنازل عن فكرة إني من اللي مفروض يجاوبوه
اهئ اهئ

و أخيرا... يـــارب يرزقك تشوف النبي في الدنيا و تسلم عليه و تحضنه وهو مبسوط منك في الآخرة :)
تحيـاتي

Posted by Wish I were a Butterfly ... | September 18, 2008 at 3:07 PM

التاج رائع سواء اسئله او ردود

ربنا يوفقك فى الفرص اللى ماغتنمتهاش

و يارب تفتكراحلامك..لان انا كمان و حلمت مش بعرف افتكر
:)
تحياتى

Posted by sa'7so'7te | September 19, 2008 at 2:12 PM

إجابات فى منهى الروعة
كل سنة وحضرتك بخير
تقبل تحياتى

Posted by mohamed ghalia | October 6, 2008 at 1:46 AM

تاج دمه خفيف جدا
جديد وبسيط

عجبتنى صراحتك
مش اى حد يعرف يقول كدا

تحياتى

Posted by رؤية | January 8, 2009 at 3:45 PM

تاج جميل فعلا

ممكن تسلفهونى شوية

Posted by آه يـا دمــاغــي | March 15, 2009 at 11:25 PM

قلت آجي أعدّي هنا يمكن ألاقي حد أسلـم عليه :). بس مش لقيت حدطبعا

عموما استمتعت بقراءة التاج دة مرة تانية..لأنه بجد من أحلى التاجز اللي قرأتها من غير مجاملة

يارب يا ولو في رمضان تشوف رؤيا جميلة أوي زي مابتتمنى ومش يعدي رمضان غير وانت غرقان في سعادة ورضا

ومش تندم على حاجةأبدا. إن شاء الله ربنا هيقدرلك كل الخير في حياتك

يـــاريت تكتب تاني بأة :)

Posted by Wish I were a Butterfly ... | September 6, 2009 at 3:19 PM

ما شاء الله . اييييييييييه ده ؟.. اسلوب راقي و ابداع يتجدد .. كتابه احترافيه نمسك الخشب :)

هما كل المدونين شطار كده ولا ايه ؟ .. أنا يعني اللي وقعت من قعر الأفه :(

أول مره أزورك بس ان شاء الله مش آخر مره

و ياريت اتشرف بحضرتك على مدونتي و نتبادل التعليقات
الرابط
http://ra7alaat.blogspot.com/

شكرا لوقتك

Posted by Anonymous | January 27, 2010 at 3:24 PM